S'è araputa ‘a fenesta

di Eduardo De Filippo

​

Stamatina ‘a fenesta s'è araputa

e chi è trasuta, neh?

chi s'è assettata ncopp''o parapetto

e cu nu pizzo a riso m'ha guardato?

Addivinate... ‘a Morte!

Nce n'è vuluto tiempo pe' capì

ch'era ‘a Morte mpersona!

E già, pecché nun era cu ll'uocchie scafutate,

cu tutt''e riente ‘a fora e senza naso

cumme sempe hanno ditto ch'era ‘a Morte...

Addò? Ma quanno maje...

Era na vicchiarella accunciulella:

me pareva ‘a Nonna, Sant'Anna.

Era, gnorsì, na faccia cummigliata

c''a pelle sulamente,

ma na pelle d''o culore d''a cera,

chella cera ca serve p''e cannele

ca se trovano ‘o juorno ‘a Cannelora;

e ddoie manelle

ch'erano ammennole ammunnate.

Ve l'haggio ditto: me pareva Sant'Anna.

M'è venuta a fa visita e m'ha ditto: "Guagliunciè"...

Pe' na perzona antica cumm''a essa

so' tutte guagliuncielle, viecchie e giùvene...

"Guagliunciè, mò nce avimmo vedé spisso,

accussì, appoc''a vota, nce truvammo gusto,

trasimmo in confidenza, in simpatia,

 fin'a quanno te piglio sott''o raccio

e parlanno parlanno te ne viene cu mmico".

"E va bene", aggio ditto,

"cumme site simpatica! V'aspetto".

 "Quann'è ca te fa comodo,

ca nun te do fastidio

e ca te trovo libero ca putimmo parlà?"

"Sempe meglio ‘e dummèneca".

"E l'orario?"

"Mmerz''e cinche e mmeze,

 io songo matinante".

 "Io", m'ha risposto e ll'è scappato a ridere,

"tengo troppo che fa', nun dormo maie".

"Viat'a vvuie", e me so miso a ridere pur'io.

"Tu pure si' simpatico..."

"Grazie del complimento".

"Aspe'...", m'ha ditto pe' tramente

se ne scenneva ‘a copp''o parapetto,

"che te vulevo dicere,

ca m'è scappat''e mente...

‘O ttengo mpizz''e lengua!

Ah, sì, me so' arricurdata:

quanno ven''a dummèneca,

lass''a fenesta aperta,

si no tu chiure... io arapo...

Sparagnammo fatica".

E se n'è scesa.